Om Ingrid Sørheim
Ingrid har ein bachelor i utøvande tradisjonsmusikk frå Ole Bull Akademiet, der ho fordjupa seg i heimtradisjonen frå Kvam i Hardanger. I 2018/2019 var ho på utveksling i Newcastle i Storbritannia og forelska seg i den keltiske toradarmusikken. Med ein forkjærleik for lydarslåttar, lystige springarar og engelske jigs har ho spesialisert seg på å overføra hardingfele- og feleslåttar til durspelet.
Ingrid har lang røynsle som både soloutøvar, pedagog, dansespelar og ensemblemusikar, og speler i mange ulike musikalske konstellasjonar. For tida er ho mest aktiv med Mjøs / Sørheim / Wolski, Vesterveg og Veijr.
Trass sin unge alder hevdar ho seg allereie i toppen av durspelklassa på Landskappleiken og er ein ettertrakta instruktør og konsertspelar på Vestlandet.
Ho har motteke fleire prisar og stipend, mellom anna Harald Bu Rekrutteringsspris med Steinar Odde og Siri Nordgård (2022), Folkemusikk Ung Stipend (2019), nominasjon til Fureprisen (2017) og Furestipendet (2014).
Ingrid Sørheim er frilans folkemusikar og pedagog på durspel. Ho er kjent for å fengsla publikum med sitt lyriske spel, sterke forteljarglede og varme utstråling. Det kriblar i både lattermuskelen, tårekanalane og dansefoten når ho står på scena.
Foto: Elisabeth Emmerhoff
“Ingrid Sørheim er ein framifrå utøvar og pedagog. Samstundes er ho også musikalsk tospråkleg, då interessa for keltisk musikk har resultert i studiopphald i England. Dette er med på å komplettere ein av dei beste yngre utøvarane på durspel i Noreg i dag.”
— Jo Asgeir Lie
“Ingrid Sørheim klarer å trollbinda publikum med musikk og forteljarglede på ein måte få andre kan skilta med.”
— Randi Jåstad, leiar i Kvam Mållag
Bruksområde
Konsertar og festivalar
Ingrid Sørheim gjer både reine solokonsertar og konsertar med profesjonelle musikarar og dansarar i ulike konstellasjonar og sjangrar.
Kurs
Ingrid Sørheim har solid undervisningserfaring og er ein ettertrakta instruktør for både nybyrjarar og vidarekomne. Sjølv påstår Ingrid at ho kan læra deg å spela toradar på berre ein halvtime!
Event
Ingrid Sørheim gjer eventoppdrag som soloartist på konferansar, seminar, kurs og meir. Lat hennar sterke glød og formidling bringa fram både latter og tårer hos publikum og gje det lille ekstra til arrangementet.
Kyrkjemusikar
Klangen frå toradaren høver godt inn i kyrkjerommet. Ingrid Sørheim speler låtar og salmetonar i bryllaup, gravferder, på gudstenester og andre kyrkjelege høve.
Dansespel
Ingrid Sørheim speler ofte til dans og byr på både gamaldans/runddans og bygdedans. Ho er kjent for å ha eit drivande dansespel med snert!
Studio
Treng du lyden av durspelet til filmmusikk, vignett, jingle eller liknande? Ta kontakt for studio-pålegg.
